1 Corinthians 10
Naha Ni Kavurike a Vure Ranga
1 aMua e huriki a turagu, a ngaru mu gu lohoka vona, e huriki a gare ne hita hosi, a bubu i matakari ria lobo na tabeke i ngeki. Ria lobo ri laho polo na dari. 2A bubu i matakari ria, ri laho polo na Dari Vururu turane Moses. A naro nga ru rata e huriki nga, ria a tara ne Moses, i manga mona a viri ni vahilolo, i dili na tara ne Kristo. 3 bRia lobo ri kani vona a maki ni kani i valai na Vure. 4 cRi ninu vona a naru i valai na Vure, a vuhuna ri ninu vona a naru na kedo i valai na Vure, ra i muri mai ria. A kedo iea, re Kristo. 5 dA maki nga ri bele ne ria, pali i kupo ne ria, a Vure i uka ma i vivi ne ria, lakea i ratapile ria na tabeke i ngeki.6 eA maki nga ri bele, ge a nivakasiri ne hita, i uka ma si gi ngaru a naro hale manga ria. 7 fNahea mu gu kavurike a vure ranga, manga e huriki nga ri rata. Ni here na Hinere i maea, “Ri made puru, ri kani, ri ninu. Muri ri pesi rike, ri rehi turane huriki a ngatavine.” 8 gNahea si gi rata a naro na molenga, i manga ranga ne ria ri rata. Ri rata mavonga, e huriki ala 23,000 ri mate na parava i taku kunana. 9 hNahea si gi tonia e Kristo, i manga e huriki ranga ne ria ri rata. Ri rata mavonga, a maka mata ri kani mate ria. 10 iNaha ni deke na Vure, i manga e huriki ranga ne ria ri rata. Ri rata mavonga, lakea a agelo na matenga i rabalaki ria. 11A vuranga nga ri bele, ge vakasiri e huriki nga i uka ma ri gi rata a naro hale. Ni here puru na hinere, ge tovo hita, ra si made pali na nilobona parava. 12I mavonga, e rei a viri i luhoi ta i pesi tora, ge matadoko, ma ge boru. 13A nitoni lobo i bele ne mua, i manga kunana a nitoni i bele ne huriki lobo. A Vure i rata a maki lobo i taki ge rata, i mavonga, na tahuna a nitoni i bele ne mua, bara i matakari mua, a nitoni i uka ma ge rangi a kinigaonga ne mua. Bara i ratea tara dala mu gu malele ha vona a nitoni, i uka ma mu gu boru.
14I mavonga, mua e huriki a turagu, mu malele ha vona a naro ni kavurike a vure ranga. 15Mu tahoka a niluhoi kamumu, lakea a taki mua. Mu luhoi kado a ngava a taki. 16 jA kikei si ninu vona na komunio, si vaveru vona a darane Kristo. Na tahuna si kevea a bret, si vaveru vona a kakaine Kristo. 17 kA bret i taku kunana. I mavonga, hita lobo si vakalipopo, hita a tara i taku kunana, a vuhuna si vaveru vona a bret i taku kunana. 18 lMu luhoi e huriki a Israel. Ri manga a kabu i taku kunana, ri kani vona a nihabi ni habi na dede, ri vaveru vona a nihabi. 19 mI uka ma a taki a vure ranga a maki muholi. I uka ma a taki a kania ni habi ne ria a maki muholi. 20 nPali a nihabi ne huriki ri made na uvo, i uka ma ri habi na Vure. Ri habi na hanitu. A koi mu gu vaveru turana hanitu. 21 oMu keri ni ninu varago a kikei ne Bakovi Dagi, a kikei na hanitu. Mu keri ni kani varago na dede ne Bakovi Dagi, a dede na hanitu. 22 pI navai? Si kinigao hateka ne Bakovi Dagi? Si gi vakarike a hatena ge bage ne hita?
A Maki Lobo Si Rata, Ge ne Vona e Bakovi Dagi Kunana
23 qMua ranga mu ta maea, “I uka tara naro ni gi pupukari iau ga rata.” Pali iau a taki, a naro ranga i uka ma ri gi kori iau. Mu ta maea, “I uka tara naro ni gi pupukari iau ga rata.” Pali iau a taki, a maki ranga i uka ma ge vakatora hita. 24 rNaha ni luhoi ni tuhori mule ioe kunana. O luhoi e huriki ranga, o tuhori ria. 25A ra kania mu kona na maket, nahea mu gu nana ria, ri bole vai, ni habi na nitamina vure o i uka. Mu kani kunana, 26 sa vuhuna ni here maea, “A malala, a maki lobo i tabuli vona, ne vona e Bakovi Dagi.” 27A bakovi tara i uka ma i luhoi torea e Kristo, ge taki ioe go kani na ruma vona, pali o ngaru ni vano, o vano. A ra maki i habi vomu, o kani kunana. Naha ni nanea i bole vai. 28 tPali ni gi taki ioe maea, “A kania nga ni habi manga a nihabi na vure.” Pali, naha ni kani, ma ge hale a niluhoi na viri i vakalongo ioe vona a kania nga. 29A ta maea, i uka ma go kori a niluhoi vomu. A ta maea, go kori a niluhoi na viri i taki ioe vona a kania nga i valai na roho na vure tebi. A viri tara bara i ta maea, “I navai a ningaru nau ni gi pupukari na niluhoi na bakovi tara? 30 uIau a kani, a kavurikea a Vure vona a kania iea, pali ri gi ta hale navai nau vona a maki a kavurikea a Vure vona pali?”31 vI mavonga, a ra maki mu ninu, a ra maki mu kani, a ra maki mu ratea, mu ratea, e huriki ri gi togoa a Vure.
32 wNa matane huriki a Iuda, e huriki a Grik, e huriki a tara na Vure, naha ni ratea tara maki ge rata ria ri gi boru. 33 xIau tara, a toni ni rata a maki e huriki lobo ri gi vivi vona. I uka ma a tuhori mule iau. A maki lobo a rata, ga tuhori e huriki ala kupo, a Vure ge korimule ria.
Copyright information for
BNP